रायगड लोकधारा वृत्तसेवा :
रायगड जिल्हा परिषद व पनवेल पंचायतसमिती निवडणूक २०२६ – संक्षिप्त आढावा…
पनवेल पंचायत समिती प्रथमच भाजपाच्या ताब्यात…
रायगड जिल्हा परिषदेच्या ८ पैकी ८ जागा भाजपच्या ताब्यात…
पनवेल पंचायत समितीच्या १६ पैकी १५ जागांवर भाजपाचे निर्विवाद वर्चस्व…
रायगड जिल्ह्यात भाजपाने जिंकलेल्या एकूण १५ जागांपैकी ८ जागा पनवेलमधून…
पनवेल प्रतिनिधी : पंतप्रधान श्री. नरेंद्र मोदी यांच्या सक्षम नेतृत्वाखाली देशभरात तसेच महाराष्ट्रात मुख्यमंत्री श्री. देवेंद्र फडणवीस यांच्या विकासाभिमुख दूरदृष्टीतून राज्यात वेगाने विकासकामे सुरू आहेत. याच विकासाच्या धर्तीवर रायगड जिल्ह्याच्या सर्वांगीण प्रगतीसाठी भाजपा प्रदेशाध्यक्ष श्री. रविंद्र चव्हाण यांच्या नेतृत्वाखाली भारतीय जनता पक्ष सातत्याने प्रभावी कार्य करत आहे. या पार्श्वभूमीवर रायगड जिल्ह्यातील ज्येष्ठ नेते मा. श्री. जे. एम. म्हात्रे यांच्या नेतृत्वाखाली श्री. प्रितम जनार्दन म्हात्रे यांनी सन २०२५ मध्ये अनेक नगरसेवक, जिल्हा परिषद सदस्य, पंचायत समिती सदस्य, ग्रामपंचायत सरपंच यांच्यासह हजारो कार्यकर्त्यांसोबत भारतीय जनता पक्षात प्रवेश केला. या प्रवेशानंतर रायगड व नवी मुंबई परिसरात भाजपाच्या संघटनात्मक बळाला मोठी चालना मिळाली असून पक्ष संघटना अधिक मजबूत झाली आहे. त्यांच्या नेतृत्वामुळे कार्यकर्त्यांमध्ये नवचैतन्य संचारले आहे.
नुकत्याच पार पडलेल्या पनवेल महानगरपालिका निवडणुकांमध्ये भारतीय जनता पक्षाने एकहाती विजय मिळवत आपले वर्चस्व सिद्ध केले. या विजयाची सुरुवात प्रितम म्हात्रे यांच्या प्रभाव असलेल्या प्रभागातून झाली, जिथे दोन नगरसेवक बिनविरोध निवडून आले. त्यानंतर पनवेल शहर परिसरातून आणखी चार नगरसेवक बिनविरोध निवडून येत एकूण सहा नगरसेवक बिनविरोध निवडून आले. विशेष म्हणजे शेतकरी कामगार पक्षातून भाजपात प्रवेश केलेल्या उमेदवारांना भाजपातर्फे संधी देऊन पुन्हा निवडून आणण्यात आले, ज्यामुळे भाजपाचा विजय अधिक ठोस ठरला.
शेकापला रायगड जिल्हा परिषदेत खातेही उघडता आले नाही….
शेतकरी कामगार पक्षाचा पारंपारिक गड मानल्या जाणाऱ्या गव्हाण, वडघर, केळवणे, वावंजे , वावेघर, पळस्पे आदी जिल्हा परिषद मतदारसंघांमध्येही भाजपाने आपली पकड भक्कम केली आहे. जिल्हा परिषद निवडणुकीदरम्यान गावोगावी भेटी देत भारतीय जनता पक्षाची विचारधारा, केंद्र व राज्य सरकारच्या विकासकामांची माहिती तसेच तरुणांसाठी रोजगार निर्मितीचे नियोजन प्रभावीपणे मतदारांपर्यंत पोहोचवण्यात आले. परिणामी पारंपारिक शेकाप मतदारांमध्ये सकारात्मक मतपरिवर्तन होऊन भाजपाच्या उमेदवारांना जनतेचा स्पष्ट कौल मिळाला.
या संपूर्ण प्रक्रियेत भाजपाचे लोकनेते मा. खासदार श्री. रामशेठ ठाकूर तसेच मा. नगराध्यक्ष श्री. जे. एम. म्हात्रे यांच्या मार्गदर्शनाखाली आमदार श्री. प्रशांत ठाकूर यांची भूमिका अत्यंत महत्त्वाची ठरली. महायुतीतील सर्व घटक पक्षांचा समन्वय साधत आमदार प्रशांत ठाकूर यांनी श्री. प्रितम म्हात्रे यांच्यासोबत थेट मतदारांपर्यंत पोहोचून प्रभावी मोर्चेबांधणी केली. या एकत्रित प्रयत्नांमुळे भाजपाने हा विजय एकहाती मिळवला, हे विशेषत्वाने अधोरेखित करावे लागेल.
कोट : “आदरणीय जे. एम. म्हात्रे साहेबांच्या नेतृत्वाखाली आम्ही भारतीय जनता पक्षात प्रवेश केल्यानंतर पक्षाच्या विचारधारेनुसार रोजगार आणि विकासाच्या दृष्टिकोनातून कामे सुरू केली. ही कामे प्रभावीपणे मतदारांपर्यंत पोहोचवण्यात आम्हाला यश आले. त्यामुळेच शेकापच्या पारंपारिक मतदारसंघातील मतदारांनी भारतीय जनता पक्षाच्या विचारधारेला मान्यता देत विकासाच्या बाजूने कौल दिला. याबद्दल मी सर्व मतदारांचे मनापासून आभार मानतो.”
श्री. प्रितम जनार्दन म्हात्रे भाजपा नेते, मा. विरोधी पक्षनेते, पनवेल महानगरपालिका
