रायगड लोकधारा वृत्त :
डोंबिवली : दुकानावरील प्रमुख नामफलक म्हणजेच पाट्या मराठीत लावा अन्यथा कारवाईला सामोरे जावं लागेल, असा इशारा कल्याण डोंबिवली महानगरपालिकेने शहरातील दुकानारांना दिला होता. शासनाच्या आदेशानुसार तात्कालिन महापालिका आयुक्तांनी शहरातील दुकानदार, आस्थापनांना सूचना दिल्या होत्या. मात्र मराठमोळ्या डोंबिवलीत चक्क दुकानावर गुजराती नांमफलक लावण्यात आले आहे. डोंबिवली मधील सावरकर रोडवर हा प्रकार दिसून आला आहे.
कल्याण डोंबिवली महानगरपालिका क्षेत्रातील सर्व दुकाने आणि आस्थापनांचे नामफलक मराठी भाषेत लावण्यात यावेत असे निर्देश पालिकेने दिले होते. त्यामुळे महापालिका क्षेत्रातील सर्व दुकाने आणि आस्थापनांना आपले नामफलक मराठी भाषेत लावणे बंधनकारक असणार आहे, मात्र डोंबिवली मधील प्रसिद्ध असलेल्या सावरकर रोडवर एका दुकानदाराने नियम मोडत चक्क गुजराती भाषेतील पाटी लावली आहे, त्यामुळे पालिका प्रशासन आणि आयुक्त करावाई करणार का हे पहावे लागेल.
काय आहेत आदेश..?
संबंधित दुकानदार वा आस्थापनेचा प्रमुख आपला नामफलक मराठी देवनागरी लिपीबरोबरच आणखी इतर भाषेतही लिहू शकतो. तथापि मराठी भाषेतील नामफलकावरील अक्षराचा आकार इतर भाषेतील अक्षरांच्या आकारापेक्षा लहान असू नये, असे शासनाच्या राजपत्रात नमूद केलेलं आहे. तसंच ज्या आस्थापनात कोणत्याही प्रकारे मद्यविक्री किंवा मद्यपान सेवा दिली जात असेल, अशा आस्थापनास महापुरुष/महनीय महिला यांची किंवा गडकिल्ल्यांची नावे देण्यात येऊ नये. या नियमाचे उल्लंघन केल्यास संबंधित दुकाने व आस्थापना मालकांवर महाराष्ट्र दुकाने व आस्थापना (नोकरीचे व सेवाशर्तीचे विनियमन)अधिनियम 2017 च्या तरतुदीनुसार न्यायालयीन कारवाई करण्यात येईल. याबाबतचा शासन निर्णय 17 मार्च 2022 रोजी जारी करण्यात आला होता.
