रायगड लोकधारा वृत्तसेवा :
रायगड लोकधारा प्रतिनिधी / डोंबिवली : डोंबिवली पूर्वेकडील खंबाळपाडा परिसरात घर बांधण्याच्या जुन्या वादातून एका व्यक्तीची निर्घृण हत्या झाल्याची धक्कादायक घटना घडली आहे. या घटनेमुळे संपूर्ण परिसरात भीती आणि खळबळ निर्माण झाली आहे.
मिळालेल्या माहितीनुसार, आरोपी रोहित शेलार आणि मृत प्रताप चौधरी यांच्यामध्ये घर बांधण्याच्या कारणावरून मागील काही दिवसांपासून वाद सुरू होता. या वादाचे रूपांतर अखेर रक्तरंजित घटनेत झाले.
संतापाच्या भरात आरोपी रोहित शेलार याने प्रताप चौधरी यांच्या घरात घुसून त्यांच्यावर धारदार शस्त्राने जीवघेणा हल्ला केला. या हल्ल्यात गंभीर जखमी झालेल्या प्रताप चौधरी यांचा मृत्यू झाला.
घटनेची माहिती मिळताच टिळक नगर पोलीस घटनास्थळी दाखल झाले. पोलिसांनी मृतदेह ताब्यात घेऊन पुढील प्रक्रिया सुरू केली आहे. दरम्यान, हल्ल्यानंतर आरोपी रोहित शेलार हा घटनास्थळावरून फरार झाला असून त्याचा शोध घेण्यासाठी पोलिसांनी विशेष पथके रवाना केली आहेत.
या घटनेचा अधिक तपास टिळक नगर पोलीस करत आहे.
