रायगड लोकधारा वृत्तसेवा :
प्रतिनिधी / अशोक घरत कोन : रविवार दिनांक १ मार्च २०२६ रोजी सकाळी ७.३० ते १०.०० या वेळेत कोन गावात डॉ. श्री.नानासाहेब धर्माधिकारी प्रतिष्ठान, रेवदंडा (ता. अलिबाग, जि. रायगड) यांच्या वतीने भव्य ‘स्वच्छता अभियान’ राबविण्यात आले. या अभियानात प्रतिष्ठानचे ‘श्री सदस्य’ मोठ्या संख्येने उपस्थित राहून संपूर्ण गाव स्वच्छ करण्याचा निर्धार पूर्ण केला.
पहाटेपासूनच गावातील प्रमुख रस्ते, सार्वजनिक ठिकाणे, गटारे, मोकळी मैदाने तसेच कचरा साचलेली ठिकाणे याठिकाणी श्री सदस्यांनी हातमोजे, फावडे, झाडू आणि अन्य साहित्यांच्या सहाय्याने स्वच्छता मोहीम राबविली. गोळा केलेला कचरा ट्रकमध्ये भरून योग्य पद्धतीने विल्हेवाट लावण्यात आला. काही तासांच्या अथक परिश्रमानंतर कोन गावाने अक्षरशः स्वच्छतेचा नवा चेहराच धारण केला.
या उपक्रमात गावचे सरपंच श्री. जितेश बाळाराम शिसवे, ग्रामपंचायत कमिटीतील सदस्य तसेच ग्रामस्थ मोठ्या संख्येने सहभागी झाले होते. ग्रामस्थांनी या अभियानाचे मनापासून स्वागत करत श्री सदस्यांचे आभार मानले. “स्वच्छ गाव, सुंदर गाव” या संकल्पनेला साकार रूप देण्यासाठी प्रतिष्ठानचा हा उपक्रम अत्यंत मोलाचा असल्याची भावना यावेळी व्यक्त करण्यात आली.
या स्वच्छता अभियानाचे प्रमुख नेतृत्व कोन गावचे श्री सदस्यांचे प्रमुख पदाधिकारी सन्माननीय श्री. सुनील खंडू म्हात्रे यांनी केले. त्यांच्या मार्गदर्शनाखाली संपूर्ण नियोजनबद्ध पद्धतीने मोहीम पार पडली. कार्यकर्त्यांमध्ये शिस्त, समन्वय आणि सेवाभाव प्रकर्षाने जाणवत होता.
स्वच्छता मोहिमेचे सामाजिक व आरोग्यदायी महत्त्व
स्वच्छता ही केवळ बाह्य देखाव्यासाठी नसून ती सार्वजनिक आरोग्याशी थेट निगडित आहे. गावातील कचरा, साचलेले पाणी, घाण यामुळे डास, माश्या आणि इतर जंतूंची वाढ होते. यामुळे डेंग्यू, मलेरिया, टायफॉईड, गॅस्ट्रो यांसारख्या रोगांचा प्रादुर्भाव होण्याची शक्यता वाढते. नियमित स्वच्छता मोहिमेमुळे अशा रोगराईला आळा बसतो आणि नागरिकांचे आरोग्य सुरक्षित राहते.
तसेच स्वच्छ परिसरामुळे नागरिकांमध्ये सकारात्मकता वाढते, पर्यावरणाचा समतोल राखला जातो आणि सामाजिक बांधिलकीची जाणीव दृढ होते. सामूहिक सहभागातून राबविण्यात येणाऱ्या अशा मोहिमा गावोगावी एकात्मता आणि सहकार्याची भावना वृद्धिंगत करतात.
डॉ. श्री नानासाहेब धर्माधिकारी प्रतिष्ठानचे श्री सदस्य हे वेळोवेळी विविध गावांमध्ये तसेच मुंबई–पुणे मार्गावरही स्वच्छता अभियान राबवत असतात. सार्वजनिक ठिकाणांची स्वच्छता राखणे ही समाजाप्रतीची जबाबदारी मानून ते सातत्याने कार्यरत आहेत. त्यांच्या या सेवाभावी कार्याचे सर्वत्र कौतुक होत असून, समाजात सकारात्मक आदर्श निर्माण होत आहे.
कोन गावातील आजच्या स्वच्छता अभियानामुळे ग्रामस्थांमध्ये स्वच्छतेबाबत जागरूकता निर्माण झाली असून भविष्यातही असे उपक्रम सातत्याने राबविण्याचा निर्धार व्यक्त करण्यात आला. श्री सदस्यांचे हे कार्य कौतुकास्पद असून त्यांच्या सेवाभावाला मनःपूर्वक सलाम व्यक्त केला जात आहे.
